9-тӥ толсуре 2011 аре Ижын Калыкъёслэн эшъяськон юртазы ортчиз “Зарни вотэс – 2011″ конкурслэн йылпумъяськемезлы сӥзем церемония. Со ужрад куспын ялэмын вал вань номинантъёслэн но, валамон ини, соос пӧлысь вормисе потэмъёслэн нимъёссы. Со сярысь ми ивортӥмы ни. Али возьматэммы потэ та нуналэ лэсьтэм куд-ог туспуктэмъёсты.

Церемониез нуисьёс: Евгения Сундукова но Владимир Вахрушев.

Лыктэм куноос.

Конкурслэн финалаз потэм проектъёсын тодматскон.

Нырысетӥ интые потӥз “Дарт” проект: приз басьто Зинаида Рябинина но Алексей Шкляев.

Нимысьтыз приз – нотубук – сётэмын вал блог нуисьлы Дарали Лелилы.

Нимысьтыз приз сётэ “Владимир Романовлы сӥзем виртуальной музей” нимо сайтлэн кузёезлы Ирина Евдокимовалы Дышетон удысын ужасьёслэсь тодон-валанъёссэс будэтонъя но выльдонъя институтлэн ректорлэсь ужзэ быдэсъясь Людмила Мустаева. Со – Удмурт Республикаысь Дышетонъя но наукая министерстволэн компьютер техникаез басьтон сертификат.

Эшшо одӥгез нимысьтыз приз. Оргкомитетысь мурт Наталья Медведева, Дышетонлэн информатизациезъя но ӟечлыксэ дунъянъя республикаысь центрлэн кивалтӥсез, кузьма “Воршуд” нимо вики-проектэз нуисьёслы USB-дискъёсты.

Мукет номинатъёс асьсэлэсь призьёссэс басьтӥзы ини.

Вань проектъёс возьматэмын, ваньмыз призъёс сётэмын, ваньмыз вераноез верамын. Кутске ужрадлэн эрико люкетэз. Кырӟа Богдан Афиногенов.

“Зарни вотэс” конкурс возьматӥз: удмурт интернет – со улэп маке, солэн вань азинскон кужымез, тунсыко проектъёсыз, мылысь-кыдысь тыршись авторъёсыз. Таӵеосыз уката уно блогъёс кылдытон удысын. Конкурслэн номинантъёс но приз басьтӥсьёс пӧлын узыр, мур пуштросъем блогъёс вань уго. Бен, жаль, соос пӧлысь ваньмыз ӧвӧл ӧз басьтэ, пе, дано интыос. Но со чик уг возьматы, конкурс йылпумъяськем бере удмурт блогъёс нокинлы кулэ ӧвӧл луизы ни шуыса. Ваньмыз – мукет сямен! “Зарни вотэсмы” вырӟытыны быгатэм удмурт вебмастеръёсты, но, соос сяна, тунсыко карыны быгатӥз на удмурт пуштросъем блогъёсты та дырлэсь азьвыл соос сярысь воксё кылымтэ-тодымтэ муртъёсты.

Тани, туэ шуркынмон толэзе “Консалтингъя Донских группа” ялӥз Улосысь блоггеръёслэсь премизэс! Со выль конкурс, “Зарни вотэсэн” огвакытэ ик вордӥськем маке, шара возьматэ ӵапак со вие блогъёслэсь туж кулэ но тунсыко луэмзэс. Мае возьмало блогъёсы гожъясьёслэсь, кыӵе номинациосын но кыӵе критериосъя дунъет сётэмын луоз конкурсэ пыриськем проектъёслы – ваньзэ тае тӥ тододы тӥни со линкъя: http://donskih.ru/blogerskaya-premiya

Но тӥледыз шулдыртэме потэ: туннэ ялэмын, конкурслэн вань номинациосаз луоз на удмурт кылын гожтэм блогъёс куспын нимысьтыз вожвылъяськон! Со сярысь лыдӟе со линкъя: http://donskih.ru/regionalnaya-blogerskaya-premiya-i-dlya-blogov-na-udmurtskom

Бен, Улосысь блоггер конкурслэн выль ужъёсты басьтэмысь дугдон нуналозяз дыр трос на. Азьвыл кылдытэм блогъёс (“Зарни вотэсэ” пыриськемъёсыз но), озьы ик копак выль удмурт проектъёс одно ик та выль конкурсэ пыриськоно луо шуфса малпасько мон!

Ыстэ проектъёстылэсь даннойёссэс таӵе линкъя: http://donskih.ru/zayavka-na-uchastie-v-regionalnoj-blogerskoj-premii

Сӥзиськом тӥледлы азинлык! Мед удмурт блоггеръёс возьматозы быдэс шаермылы мар лэсьтыны быгатэмзэс!